ജോബി ബേബി,
നഴ്സ്,കുവൈറ്റ്
കാന്‍സര്‍ ചികിത്സയില്‍ മൂന്ന് പ്രധാന ഘടകങ്ങളുണ്ട്- ശസ്ത്രക്രിയ, കീമോതെറപ്പി, റേഡിയേഷന്‍.സ്തനം, ശ്വാസകോശം, വന്‍കുടല്‍ തുടങ്ങിയ അവയവങ്ങളില്‍ വരുന്ന അര്‍ബുദങ്ങള്‍ പ്രാരംഭ ഘട്ടത്തില്‍തന്നെ കണ്ടെത്തിയാല്‍ ശസ്ത്രക്രിയയിലൂടെ ഭേദമാക്കാം. എന്നിരുന്നാലും ഒരു വ്യക്തിയുടെ ഡി.എന്‍.എയിലെ മാറ്റങ്ങളുടെ ഫലമായാണ് അര്‍ബുദം സംഭവിക്കുന്നത് എന്നതിനാല്‍, വലിയൊരു ശതമാനം ആളുകളിലും രോഗ ആവര്‍ത്തനത്തിന് സാധ്യതയുണ്ട്.
ഇത് തടയാന്‍ കീമോതെറപ്പി ആവശ്യമാണ്. ഇതിനെ അഡ്ജുവന്റ് കീമോതെറപ്പി എന്ന് വിളിക്കുന്നു. ട്യൂമറിന്റെ വലുപ്പം കുറയ്ക്കുന്നതിനും അവ പ്രവര്‍ത്തനക്ഷമമാക്കുന്നതിനും ഡോക്ടര്‍മാര്‍ നിയോ അഡ്ജുവന്റ് കീമോതെറപ്പി ഉപയോഗിച്ചേക്കാം. അര്‍ബുദം ശരീരത്തിന്റെ മറ്റ് ഭാഗങ്ങളിലേക്ക് വ്യാപിച്ചിട്ടുണ്ടെങ്കില്‍ സ്റ്റേജ് 4 കാന്‍സര്‍ പോലെ പാലിയേറ്റീവ് കീമോതെറാപ്പിയിലൂടെ രോഗലക്ഷണങ്ങള്‍ കുറയ്ക്കാന്‍ സഹായിക്കുന്നു.
കീമോതെറാപ്പിയും മരുന്നുകളും
കാന്‍സര്‍ ചികിത്സയില്‍ ഉപയോഗിക്കുന്ന ഏതൊരു മരുന്നും കീമോതെറപ്പിയുടെ വിശാലമായ കുടക്കീഴില്‍ വരുന്നു. പരമ്പരാഗതമായി ശരീരത്തില്‍ സ്വാഭാവികമായി സംഭവിക്കുന്ന കോശചക്രത്തെ തടഞ്ഞ് ട്യൂമറുകളുടെ വളര്‍ച്ചയെ തടയുന്ന സൈറ്റോടോക്‌സിക് കീമോതെറപ്പി മരുന്നുകള്‍ ഇതിന് കീഴില്‍ ഉള്‍പ്പെടുത്തിയിട്ടുണ്ട്. ഡോക്സോറൂബിസിന്‍, സിസ്പ്ലാറ്റിന്‍, പെമെട്രെക്സേറ്റ്, പാക്ലിറ്റാക്സല്‍ തുടങ്ങിയ മരുന്നുകള്‍ കാന്‍സര്‍ ചികിത്സയ്ക്കുള്ള ശക്തമായ മരുന്നുകളാണ്. എന്നിരുന്നാലും, അതിവേഗം വളരുന്ന മറ്റ് കോശങ്ങളുടെ വളര്‍ച്ച തടയുന്നതിലൂടെ അവ കൊളാറ്ററല്‍ നാശത്തിനും കാരണമാകുന്നു. ഇത് വായിലെ അള്‍സര്‍, മുടികൊഴിച്ചില്‍, രക്തത്തിന്റെ അളവ് കുറയല്‍ എന്നിവയ്ക്ക് കാരണമാകും.വിവിധ ഘട്ടങ്ങളില്‍ കര്‍ശനമായ നിരീക്ഷണത്തിലാണ് രോഗിക്ക് മരുന്ന് നല്‍കുന്നത്.
ചില കീമോതെറപ്പി മരുന്നുകള്‍ ഒരിക്കല്‍ ചോര്‍ന്നാല്‍ ചര്‍മത്തിനും ടിഷ്യൂകള്‍ക്കും കേടുപാടുകള്‍ സംഭവിക്കാം. അതിനാല്‍ മരുന്നുകള്‍ കൃത്യമായി നല്‍കുന്നുവെന്ന് ഉറപ്പാക്കാന്‍ പരിചയസമ്പന്നനായ ഒരു നഴ്സ് ആവശ്യമാണ്.ഡോക്ടര്‍ നല്‍കുന്ന പ്രോട്ടോകോള്‍ കുറിപ്പടി ഉപയോഗിച്ച് ഡോസേജും മരുന്നുകളും അവര്‍ പരിശോധിച്ച ശേഷമാണ് രോഗിക്ക് നല്‍കുന്നത്.
കീമോയ്ക്ക് ശേഷം എന്ത് സംഭവിക്കും
രോഗികള്‍ക്ക് ഓക്കാനം, ക്ഷീണം എന്നിവ രണ്ടു ദിവസത്തേക്ക് അനുഭവപ്പെടാം. വിശപ്പും കുറയുന്നു. അതിനാല്‍ ധാരാളം വെള്ളം കുടിക്കാനും ചെറിയ അളവില്‍ ഭക്ഷണം കഴിക്കാനും അവരോട് നിര്‍ദേശിക്കുന്നു. മിക്ക ഡേ കെയര്‍ കീമോകളിലും രോഗികള്‍ക്ക് അവരുടെ ദൈനംദിന പ്രവര്‍ത്തനങ്ങള്‍ തുടരാനും ജോലിയിലേക്ക് മടങ്ങാനും കഴിയും. 7-10 ദിവസത്തിന് ശേഷം അവരുടെ രക്തം പരിശോധിക്കാന്‍ നിര്‍ദേശിക്കുന്നു. പനി ഉണ്ടായാല്‍ അറിയിക്കുകയും ഉചിതമായ ചികിത്സ സ്വീകരിക്കുകയും വേണം.
മിക്ക കേന്ദ്രങ്ങളിലും പ്രത്യേക ഹെല്‍പ് ലൈന്‍ നമ്പരുകള്‍ ഉണ്ട്. രോഗികള്‍ക്ക് എന്തെങ്കിലും ബുദ്ധിമുട്ടുണ്ടായാല്‍ അവരെ ബന്ധപ്പെടാനും മാര്‍ഗനിര്‍ദേശം സ്വീകരിക്കാനും കഴിയും. ചിലരില്‍ മുടികൊഴിച്ചിലുണ്ടാകാം. എന്നാല്‍, എല്ലാവരുടെയും മുടി കൊഴിയണമെന്നില്ല. കാന്‍സറിന്റെ ഘട്ടത്തെയും തരത്തെയും ആശ്രയിച്ച് ഇത് വ്യത്യാസപ്പെടാം.മുടികൊഴിച്ചില്‍ തടയാന്‍ തലയോട്ടിയിലെ തണുപ്പിക്കല്‍ രീതി ഒരു പരിധിവരെ ഫലപ്രദമാണ്. കീമോ സമയത്ത് രോഗികളെ പതിവായി വിലയിരുത്തുകയും സാധാരണ ഡോസ് താങ്ങാന്‍ കഴിയുന്നില്ലെങ്കില്‍ ഡോസ് ക്രമീകരണം നടത്തുകയും ചെയ്യുന്നു.
കാന്‍സര്‍ ചികിത്സയുടെ അവിഭാജ്യ ഘടകമാണ് കീമോതെറപ്പി.കൃത്യമായ കൗണ്‍സലിംഗിലൂടെയാണ് ഇതു സംബന്ധിച്ച ഭയം പരിഹരിക്കേണ്ടത്. കീമോതെറപ്പി സെഷനുകള്‍ എങ്ങനെ വിജയകരമായി പൂര്‍ത്തിയാക്കാമെന്ന് ഓങ്കോളജിസ്റ്റ്, ഫാര്‍മസിസ്റ്റ്, നഴ്സ്, സോഷ്യല്‍ വര്‍ക്കര്‍ എന്നിവര്‍ രോഗിയെ ബോധ്യപ്പെടുത്തണം. ഇത് ശരിയായി ചെയ്തില്ലെങ്കില്‍ രോഗികള്‍ സമ്മതിക്കില്ല. ഇത് ദീര്‍ഘകാല രോഗശാന്തിക്ക് സാധ്യത കുറക്കുന്നു.
.jpg)
Comments