ജാര്‍ഖണ്ഡ്: കോവിഡ് രോഗബാധയെ തുടര്‍ന്നു ജാര്‍ഖണ്ഡിലെ ഗുംല രൂപതാധ്യക്ഷന്‍ ബിഷപ്പ് പോള്‍ അലോയിസ് ലക്ര (65) കാലം ചെയ്തു.  ചൊവ്വാഴ്ച പുലര്‍ച്ചെ 1:30 ന് റാഞ്ചിയിലെ ഓര്‍ക്കിഡ് മെഡിക്കല്‍ സെന്ററില്‍ ചികിത്സയിലായിരിക്കെയാണ് അന്ത്യം. 1955 ജൂലൈ 11ന് ഗുംല രൂപതയായ നാദിറ്റോലി ഗ്രാമത്തിലാണ് പോള്‍ ലക്രയുടെ ജനനം. ഗുംലയിലെ സെന്റ് പാട്രിക്‌സ് സ്‌കൂളിലും തുടര്‍ന്ന് സെന്റ് ഇഗ്‌നേഷ്യസ് ഹൈസ്‌കൂളിലും കാര്‍ട്ടിക് ഒറയോണ്‍ കോളേജില്‍ പഠനം നടത്തി. 1976ല്‍ റാഞ്ചിയിലെ സെന്റ് ആല്‍ബര്‍ട്ട്‌സ് കോളേജിലെ സെമിനാരിയില്‍ പ്രവേശിച്ചു. റാഞ്ചിയിലെ സെന്റ് സേവ്യേഴ്‌സ് കോളേജില്‍ നിന്ന് ബിരുദം നേടി (197780). തുടര്‍ന്ന് അദ്ദേഹം തത്ത്വചിന്ത (1980 1983)യില്‍ പഠനം നടത്തി. 1988 മെയ് 6 ന് റാഞ്ചി അതിരൂപത വൈദികനായി അഭിഷിക്തനായി. 1993 ല്‍ ഗുംല രൂപതയുടെ രൂപീകരണത്തോടെ അദ്ദേഹത്തെ രൂപതയിലേക്ക് നിയോഗിച്ചു. 2004 ല്‍ രൂപത അപ്പസ്‌തോലിക് അഡ്മിനിസ്‌ട്രേറ്ററായി നിയമിച്ചു.2006 ജനുവരി 28ന് അന്‍പതാം വയസ്സില്‍ ബെനഡിക്ട് പതിനാറാമന്‍ മാര്‍പാപ്പ അദ്ദേഹത്തെ ഗുംലയിലെ രണ്ടാമത്തെ ബിഷപ്പായി നിയമിക്കുകയായിരിന്നു. മൃതസംസ്‌കാരം ജൂണ്‍ 16ന് രാവിലെ 10 ന് ഗുംലയിലെ സെന്റ് പാട്രിക് കത്തീഡ്രലില്‍ നടക്കും. സംസ്‌കാര ശുശ്രൂഷകള്‍ക്ക് റാഞ്ചി അതിരൂപതാധ്യക്ഷന്‍ ആര്‍ച്ച് ബിഷപ്പ് ഫെലിക്‌സ് ടോപ്പോ എസ്.ജെ മുഖ്യകാര്‍മ്മികത്വം വഹിക്കും.