അസ്സീസിയിലെ വിശുദ്ധ ഫ്രാൻസിസിന്റെ 800-ാം ചരമവാർഷികത്തോടനുബന്ധിച്ച് ഇറ്റലിയിലെ ചരിത്രപ്രസിദ്ധമായ അസ്സീസി ഫ്രാൻസിസ്കൻ ബസിലിക്കയും അതിലെ അപൂർവ കലാസൃഷ്ടികളും ഡിജിറ്റലായി പകർത്തി സൂക്ഷിക്കുന്നതിനുള്ള പുതിയ പദ്ധതിക്ക് തുടക്കമായി. ഇതിനായി തത്സമയ സന്ദർശനാനുഭവം നൽകുന്ന പുതിയ പ്ലാറ്റ്‌ഫോം പുറത്തിറക്കിയതായി റിപ്പോർട്ടുകൾ വ്യക്തമാക്കുന്നു.

‘അൽത്താ ഡെഫിനിറ്റ്സ്യോനെ’ എന്ന സ്ഥാപനത്തിന്റെ സാങ്കേതിക സഹകരണത്തോടെ ബസിലിക്കയുടെ ആന്തരിക ഭാഗങ്ങളും ചുമർചിത്രങ്ങളും അതിസൂക്ഷ്മമായ ഡിജിറ്റൽ ക്യാമറ സാങ്കേതികവിദ്യ ഉപയോഗിച്ച് പകർത്തി പരിപാലിക്കുന്നതാണ് പുതിയ പദ്ധതി. ഇറ്റാലിയൻ നവോത്ഥാന ചിത്രകലയിലെ ഇതിഹാസങ്ങളായ ജിയോടോ, ചിമാബുവെ തുടങ്ങിയ മഹാരഥന്മാർ വരച്ച ചുവർചിത്രങ്ങൾ വരുംതലമുറകൾക്കായി യാതൊരു കേടുപാടുകളും കൂടാതെ ഓൺലൈനായി സൂക്ഷിക്കുക എന്നതാണ് ഡിജിറ്റലൈസേഷന്റെ പ്രധാന ലക്ഷ്യം.

ലോകത്തിന്റെ ഏത് കോണിലുള്ള വിശ്വാസികൾക്കും ഗവേഷകർക്കും ഡിജിറ്റൽ മാധ്യമത്തിലൂടെ ബസിലിക്കയുടെ ഉള്ളിലെ ആത്മീയ-കലാ അന്തരീക്ഷം ഉയർന്ന റെസല്യൂഷനിൽ നേരിട്ട് കണ്ട് ആസ്വദിക്കാൻ ഈ പ്ലാറ്റ്‌ഫോം അവസരമൊരുക്കുന്നു. വിശുദ്ധ ഫ്രാൻസിസിന്റെ സമാധാനത്തിന്റെയും പ്രകൃതിസ്നേഹത്തിന്റെയും സന്ദേശം പുതിയ കാലഘട്ടത്തിലേക്ക് എത്തിക്കുന്നതിനൊപ്പം, നൂറ്റാണ്ടുകൾ പഴക്കമുള്ള കത്തോലിക്കാ സഭയുടെ ചരിത്രപരമായ പൈതൃക സ്മാരകങ്ങൾ സംരക്ഷിക്കുന്നതിലെ പ്രധാന നാഴികക്കല്ലായാണ് ഈ നടപടി വിലയിരുത്തപ്പെടുന്നത്.