പാലാരിവട്ടം: കെ.സി.ബി.സി പ്രൊലൈഫ് സംഘടനയുടെ ആഭിമുഖ്യത്തിൽ ‘ജീവാഭിഷേകം’ എന്ന പേരിൽ മൂന്ന് ദിവസത്തെ പ്രൊലൈഫ് ട്രെയിനിങ് റിട്രീറ്റ് നവംബർ 28 മുതൽ 30 വരെ പാലാരിവട്ടം പാസ്റ്ററൽ ഓറിയന്റേഷൻ സെന്ററിൽ (P.O.C) സംഘടിപ്പിക്കുന്നു. ഫാമിലി കമ്മീഷൻ ചെയർമാൻ ബിഷപ്പ് ഡോ.പോൾ ആന്റണി മുല്ലശേരി ഉദ്ഘാടനം ചെയ്തു.

ജീവന്റെ മഹത്വം, ഗർഭസ്ഥ ശിശുവിന്റെ അവകാശങ്ങൾ, ക്രിസ്തീയ മൂല്യങ്ങൾ അടിസ്ഥാനമാക്കിയുള്ള ജീവൻ സംരക്ഷണ സന്ദേശം, കുടുംബ ശുദ്ധിയും മാന്യതയും തുടങ്ങിയ മേഖലകളിൽ പരിശീലനം നൽകുക എന്നതാണ് ഈ റിട്രീറ്റിന്റെ പ്രധാന ലക്ഷ്യം. സമൂഹത്തിൽ ഉയർന്നുവരുന്ന ജീവഹാനികരമായ പ്രവണതകൾക്കെതിരെ ക്രൈസ്തവ മൂല്യങ്ങളെ അടിസ്ഥാനമാക്കിയുള്ള പ്രബലമായ സാക്ഷ്യം ഉയർത്തിപ്പിടിക്കുവാനും യുവാക്കളെയും വിശ്വാസികളെയും സന്നദ്ധരാക്കുവാനും ഉള്ള ശ്രമത്തിന്റെ ഭാഗമായാണ് ഈ പരിശീലനക്യാമ്പ് സംഘടിപ്പിച്ചിരിക്കുന്നത്.

ശിശുവിന്റെ ഗർഭസ്ഥജീവിതത്തെ ചിത്രീകരിക്കുന്ന ദൃശ്യചിഹ്നം പ്രോഗ്രാമിന്റെ മുഖ്യ സന്ദേശമായ ‘ജീവൻ ദൈവത്തിന്റെ അനുഗ്രഹവും വിശുദ്ധ വാഗ്ദാനവുമാണ്’ എന്നതിനെ ശക്തിപ്പെടുത്തുന്നു. പ്രോലൈഫ് സംസ്ഥാന പ്രസിഡന്റ് ജോൺസൻ ചൂരേപറമ്പിൽ അധ്യക്ഷത വഹിച്ചു. കെസിബിസി ഡപ്യൂട്ടി സെക്രട്ടറി റവ.ഫാ.തോമസ് തറയിൽ , ഫാമിലി കമ്മീഷൻ സെക്രട്ടറി, റവ.ഡോ.ക്ലീറ്റസ് കതിർപറമ്പിൽ , പ്രോലൈഫ് ആനിമേറ്റർ സാബു ജോസഫ് എന്നിവർ സംസാരിച്ചു.