കോട്ടയം: കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് അന്ധതയും ബധിരതയും ഒരുമിച്ചുണ്ടാകുന്ന വൈകല്യവസ്ഥയെ തോല്പ്പിച്ച് ലോകത്തിന് മാതൃകയായ ഹെലന് കെല്ലറിനെ അനുസ്മരിച്ചുകൊണ്ട് ഹെലന് കെല്ലര് ദിനാചരണം സംഘടിപ്പിച്ചു. അസിം പ്രേംജി ഫൗണ്ടേഷന്റെ സഹകരണത്തോടെ തെള്ളകം ചൈതന്യയില് സംഘടിപ്പിച്ച അനുസ്മരണ ചടങ്ങിന്റെ ഉദ്ഘാടനം അതിരമ്പുഴ ഗ്രാമപഞ്ചായത്ത് പ്രസിഡന്റ് ജോസ് ജോസഫ് അമ്പലക്കുളം നിര്വ്വഹിച്ചു. അതിരമ്പുഴ ഗ്രാമപഞ്ചായത്ത് മെമ്പര് ആലീസ് ജോസഫ് ചടങ്ങില് അദ്ധ്യക്ഷത വഹിച്ചു. കെ.എസ്.എസ്.എസ് എക്സിക്യൂട്ടീവ് ഡയറക്ടര് ഫാ. സുനില് പെരുമാനൂര്, കെ.എസ്.എസ്.എസ് പ്രോഗ്രാം ഓഫീസര് ഷൈല തോമസ് എന്നിവര് പ്രസംഗിച്ചു. സമ്മേളനത്തോടനുബന്ധിച്ച് ഡല്ഹിയില് നടന്ന ഖേലോ ഇന്ഡ്യ പാരാ ഗെയിംസില് പുരുഷ ടി20 ഷോട്പുട്ടില് വെള്ളി മെഡല് കരസ്ഥമാക്കിയ കോട്ടയം അതിരമ്പുഴ സ്വദേശി അജില് സേവ്യറിനെയും എസ്.എസ്.എല്.സി, പ്ലസ് ടു പരീക്ഷകളില് മികച്ച വിജയം കരസ്ഥമാക്കിയ ഭിന്നശേഷിയുള്ള കുട്ടികളെയും ആദരിച്ചു. കൂടാതെ കുട്ടികളുടെ കലാപരിപാടികളും വിവിധ മത്സരങ്ങളും നടത്തപ്പെട്ടു. അനുസ്മരണ ചടങ്ങിനോടനുബന്ധിച്ച് ഭിന്നശേഷിയുള്ള കുട്ടികളുടെ മാതാപിതാക്കള്ക്കായി സംഘടിപ്പിച്ച സെമിനാറിന് കോട്ടയം ജില്ലാ ചൈല്ഡ് ലൈന് കോര്ഡിനേറ്റര് ജെസ്റ്റിന് മൈക്കിള് നേതൃത്വം നല്കി. ഭിന്നശേഷിയുള്ളവരുടെ അവകാശ സംരക്ഷണത്തോടൊപ്പം ആനുകൂല്യങ്ങളുടെ ലഭ്യമാക്കലിനും വഴിയൊരുക്കുക എന്ന ലക്ഷ്യത്തോടെ സംഘടിപ്പിച്ച സംഗമത്തില് ഭിന്നശേഷിയുള്ള കുട്ടികളും മാതാപിതാക്കളും പങ്കെടുത്തു. അന്ധബധിര വൈകല്യമുള്ളവരുടെ സമഗ്ര ഉന്നമനത്തിനായി കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് പാലാ ചേര്പ്പുങ്കല് ഗുഡ് സമരിറ്റന് റിസോഴ്സ് സെന്ററിലും കടുത്തുരുത്തി പൂഴിക്കോല് മര്ത്താ ഭവനിലും അന്ധബധിര റിസോഴ്സ് സെന്റര് പ്രവര്ത്തിച്ചു വരുന്നുണ്ട്.
ഫോട്ടോ : കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് തെള്ളകം ചൈതന്യയില് സംഘടിപ്പിച്ച ഹെലന് കെല്ലര് അനുസ്മരണ സമ്മേളനത്തിന്റെ ഉദ്ഘാടനം അതിരമ്പുഴ ഗ്രാമപഞ്ചായത്ത് പ്രസിഡന്റ് ജോസ് ജോസഫ് അമ്പലക്കുളംനിര്വ്വഹിക്കുന്നു.
ഫാ. സുനില് പെരുമാനൂര്
എക്സിക്യൂട്ടീവ് ഡയറക്ടര്
Comments