നന്മയിലേക്ക് നയിക്കുന്നതാണ് യഥാർത്ഥ സ്വാതന്ത്ര്യം: ഫ്രാൻസിസ് പാപ്പാ

മറ്റുള്ളവരുടെ ജീവിതത്തെ നന്മയിലേക്ക് നയിക്കുന്നതാണ് ശരിയായ സ്വാതന്ത്ര്യമെന്ന് ഫ്രാൻസിസ് പാപ്പാ.
മറ്റൊരു വ്യക്തിയുടെ ജീവിതത്തെ പരിവർത്തനം ചെയ്യുകയും അയാളെ നന്മയിലേക്ക് വളരുവാൻ പ്രേരിപ്പിക്കുകയും ചെയ്യുന്നതാണ് യഥാർത്ഥ സ്വാതന്ത്ര്യമെന്ന് ഫ്രാൻസിസ് പാപ്പാ ഉദ്‌ബോധിപ്പിച്ചു. ഒക്ടോബർ ആറിന് പതിവ് പൊതുകൂടിക്കാഴ്ചാവേളയിൽ നടത്തിയ പ്രബോധനവുമായി ബന്ധപ്പെടുത്തി ട്വിറ്ററിൽ കുറിച്ച സന്ദേശത്തിലാണ് പാപ്പാ ഇങ്ങനെ ഓർമ്മിപ്പിച്ചത്. "പൊതുകൂടിക്കാഴ്ച" (#GeneralAudience) എന്ന ഹാഷ്‌ടാഗോടുകൂടിയാണ് പാപ്പാ മറ്റുള്ളവരുടെ നന്മയെ ലക്ഷ്യം കാണുന്ന സ്വാതന്ത്ര്യത്തിന്റെ യഥാർത്ഥ മുഖത്തെക്കുറിച്ചുള്ള തന്റെ സന്ദേശം അയച്ചത്.

വിശുദ്ധ പൗലോസ് ഗലാത്തിയാക്കാർക്ക് എഴുതിയ ലേഖനം നാലാമധ്യായത്തിൽ ക്രിസ്തു നൽകുന്ന സ്വാതന്ത്ര്യവുമായി ബന്ധപ്പെട്ട ഭാഗമായിരുന്നു ബുധനാഴ്ചത്തെ പൊതുകൂടിക്കാഴ്ചാവേളയിൽ പാപ്പയുടെ പ്രബോധനവിഷയം.

വിവിധഭാഷകളിലായി 4 കോടിയിലേറെവരുന്ന ട്വിറ്റര്‍ അനുയായികളുള്ള പാപ്പാ കുറിക്കുന്ന ട്വിറ്റര്‍ സന്ദേശങ്ങള്‍, സാധാരണ, അറബി, ലത്തീന്‍, ജര്‍മ്മന്‍, ഇറ്റാലിയന്‍,  ഇംഗ്ലീഷ്, സ്പാനിഷ്, പോളിഷ്, പോര്‍ച്ചുഗീസ്, ഫ്രഞ്ച്, എന്നിങ്ങനെ 9 ഭാഷകളില്‍ ലഭ്യമാണ്.