ജീവിതസായന്തനത്തിന്റെ വിരസതയും ആകുലതയുമകറ്റാൻ കെ.സി.ബി.സി മീഡിയകമ്മീഷനും പാലാരിവട്ടം പി.ഒ.സിയും സംയുക്തമായി സംഘടിപ്പിക്കുന്ന മധുരം സായന്തനം പരിപാടിയുടെ ഭാഗമായി, മാസംതോറും നടത്തിവരുന്ന യോഗത്തിൽ കുചേലവൃത്തം കഥകളിയിലൂടെ മലയാളികളുടെ മനം കവർന്ന പ്രഗത്ഭനും കൃഷ്ണ ഹോസ്പിറ്റൽ മാനേജിങ്ഡയറക്ടറുമായ ഡോക്ടർ എ.കെ. സഭാപതിയെ ആദരിച്ചു. അദ്ദേഹത്തിന്റെ മകളും ഡോക്ടറുമായ ചിത്രയും അദ്ദേഹത്തോടൊപ്പം സന്നിഹിതയായിരുന്നു. നടനും സിനിമാസംവിധാകനുമായ അനീഷ് പോൾ ആധ്യക്ഷം വഹിച്ച ചടങ്ങിൽ പാലാരിവട്ടം പി ഓ സി ഡയറക്ടർ ഫാ. ജേക്കബ് പാലയ്ക്കാപ്പിള്ളി, കെ സി ബി സി മീഡിയാ കമ്മീഷൻ സെക്രട്ടറി ഫാ. എബ്രഹാം ഇരിമ്പിനിക്കൽ, സംഘടനയുടെ മറ്റു ഭാരവാഹികൾ എന്നിവർ സംസാരിച്ചു. കലാകാരൻമാരുടെ ദേശീയസംഘടനയായ 'നന്മ' യുടെ ആഭിമുഖ്യത്തിൽ ഗാനമേളയും മിമിക്സ് പരേഡും അവതരിപ്പിച്ചു. പ്രസ്തുത യോഗത്തിൽ കെ സി ബി സിയുടെ കീഴിൽ നടത്തപ്പെടുന്ന മധുരം സായന്തനം പരിപാടിയുടെ പേരിൽ ഉപഹാരവും സമർപ്പിച്ചു.