കേരള കത്തോലിക്കാസഭ ബൈബിള്‍ പാരായണ മാസം ആചരിക്കുന്നു.

    വചനം മാംസമായ ക്രിസ്തുമസിന്റെ ഓര്‍മ ആചരിക്കുന്ന ഡിസംബര്‍ മാസം ബൈബിള്‍ പാരായണമാസമായി കേരളസത്തോലിക്കാ സഭ ആചരിക്കുന്നു. ദൈവചിന്തയും, ദൈവീകനന്മയും സ്‌നേഹവും നിറഞ്ഞ കുറേക്കൂടി നന്മയുള്ള സമൂഹത്തെ വാര്‍ത്തെടുക്കുന്നതിനുവേണ്ടിയാണ് ഡിസംബര്‍മാസം മുഴുവനും ബൈബിള്‍ പാരായണമാസമായി കേരളസഭ ആചരിക്കുന്നത്. വചനപാരായണമാസ ഉദ്ഘാടനം കോതമംഗലം  കത്തീഡ്രല്‍ പള്ളിയില്‍വച്ച്  കെ.സി.ബി.സി. ബൈബിള്‍ കമ്മീഷന്‍ വൈസ് ചെയര്‍മാന്‍ ബിഷപ് ജോണ്‍ നെല്ലിക്കുന്നേല്‍ പിതാവും, കോതമംഗലം ബിഷപ് ജോര്‍ജ്ജ് മഠത്തികണ്ടത്തില്‍ പിതാവും നിര്‍വഹിക്കും. കെ.സി.ബി.സി. തലത്തിലുള്ള 110 മണിക്കൂര്‍ രാത്രിയും പകലും നീണ്ടുനില്‍ക്കുന്ന അഖണ്ഡ ബൈബിള്‍ പാരായണയജ്ഞം കെ.സി.ബി.സി. വൈസ്‌ചെയര്‍മാന്‍ ഇരിങ്ങാലക്കുട രൂപതയിലെ തേശേരി ഇടവകയില്‍ ഉദ്ഘാടനം ചെയ്യും. ഡിസംബര്‍ 17 ഞായറാഴ്ച എല്ലാ ഇടവകകളിലും ബൈബിള്‍ ഞായറിനോടനുബന്ധിച്ച് വിവിധങ്ങളായ ആഘോഷങ്ങള്‍ നടക്കും. 
    ഈ വര്‍ഷത്തെ സംസ്ഥാന ബൈബിള്‍ കലോത്സവം ഡിസംബര്‍ 29,30 തീയതികളില്‍ തേവര സേക്രട്ട് ഹാര്‍ട്ട് കോളേജില്‍ വച്ച് നടത്തപ്പെടും. കേരളത്തിലെ എല്ലാ രൂപതകളും ഇതില്‍ പങ്കെടുക്കും. ബൈബിള്‍ പാരായണമാസത്തിന്റെ സമാപനം ഡിസംബര്‍ 31ന് വരാപ്പുഴഅതിരൂപതയിലെ ചെമ്പുമുക്ക് സെന്റ് മൈക്കിള്‍സ് ദേവാലയത്തില്‍വച്ച് നടത്തപ്പെടും. ബൈബിള്‍ കമ്മീഷന്‍ ചെയര്‍മാന്‍ ബിഷപ് ജെയിംസ് ആനാപറമ്പില്‍ ഈ വര്‍ഷത്തെ ബൈബിള്‍ പാരായണമാസത്തിന് സമാപനംകുറിച്ചുകൊണ്ട് 2024 പുതിയ വര്‍ഷത്തെ വരവേല്‍ക്കും. സമാപനത്തിന് ചെമ്പുമുക്ക് ഇടവകയും ഡിവൈന്‍ മേഴ്‌സി ഫെല്ലോഷിപ്പും നേതൃത്വം കൊടുക്കും. 2023ലെ ബൈബിള്‍ പാരായണ മാസത്തിനായി കേരളത്തിലെ എല്ലാ രൂപതകളും ഇടവകകളും ഒരുക്കങ്ങള്‍ പൂര്‍ത്തിയാക്കിവരുന്നു.
                        

                            ഡോ. ജോജു കോക്കാട്ട്
                            സെക്രട്ടറി, കെ.സി.ബി.സി. ബൈബിള്‍ കമ്മീഷന്‍